Søgu- og samfelagsdeildin

Á Søgu- og samfelagsdeildini verður undirvíst og granskað í mongum ymiskum søguligum og samfelagsligum viðurskiftum.

Granskingin er grundstøðið undir undirvísingini og verður útint úr somu vísindaligu sjónarhornum og háttaløgum sum søgu- og samfelagsgransking yvirhøvur. Tó er útgangsstøðið aloftast í Føroyum og føroyskum viðurskiftum.

Undirvísingin er somuleiðis rótfest í tilfari og dømum, sum eisini eru viðkomandi fyri tað føroyska samfelagið.

Mangar útbúgvingar eru at velja í á Søgu- og samfelagsdeildini, bæði á bachelor- og masterstigi. Somuleiðis hava vit hjánám og stakgreinalestur.

Eisini ber til at taka ph.d.-útbúgving hjá okkum.