Myndin er tikin á stóru prógvhandanini, sum Setrið helt í Norðurlandahúsinum 23. juni. Tilsamans 209 hava staðið prógv frá Setrinum hetta seinasta lestrarárið
389 umsóknir til lestur á Setrinum í 2023
340 av teimum tilsamans 389 umsóknunum um lestrarpláss í 2023 eru til tær 13 bachelorútbúgvingarnar, sum vórðu bodnar út í ár
Lestrarskrivstovan á Fróðskaparsetri Føroya er nú liðug við at telja umsóknirnar, sum eru komnar um lestrarpláss í 2023. Samlaða umsóknartalið er 389, og 340 av teimum hava søkt um bachelorútbúgving, 48 um masterútbúgving og ein um hjánám.
Sjúkrarøktarfrøði, sum fólk kunnu søkja bæði á vetri og sumri, hevur í 2023 fingið tilsamans 99 umsóknir, og so hevur bachelorútbúgvingin í Løgfrøði nú í summar fingið ikki færri enn 58 umsóknir. Bachelor í Løgfrøði var á fyrsta sinni boðin út í 2019, og tá komu 49 umsóknir inn.
Fróðskaparsetur Føroya bjóðaði eisini nýggja masterútbúgving út í Dátuvísindum í ár, og har komu 16 umsóknir inn.
Lestrarskrivstovan viðger nú umsóknirnar, og allir umsøkjarar fáa svar í seinasta lagi mánadagin 10. juli.
Her sæst býtið av umsóknum til tær ymisku útbúgvingarnar:
