Anna-Elisabeth Holm í uppskoti at fáa BAAL Book Prize

Anna-Elisabeth Holm, adjunktur á Føroyamálsdeildini á Setrinum, er ein av fýra høvundum á úrvalslista at fáa ársins BAAL Book Prize fyri útgávu sína í bókarøðini Routledge Critical Studies in Multilingualism

Tá Anna-Elisabeth Holm stóð sína ph.d.-verju á Heriot-Watt University í ringastu koronutíð í 2021, hevði metingarnevndin á máli, at í granskingartilfari hennara var av sonnum gott tilfar til bókaútgávu.

Ph.d.-ritgerð hennara eitur New Times in the Faroe Islands, New Speakers of Faroese and Sociolinguistics of Labour Market Inclusion: Challenges and Opportunities, og Anna-Elisabeth Holm lá ikki á boðunum eftir væleydnaðu verjuna.

Alt fyri eitt fór hon aftur til arbeiðis, og úrslitið bleiv bókaverkið, sum nú hevur vakt ans altjóða og er í uppskot at fáa bókaheiðurslønina BAAL, sum er stytting fyri British Association for Applied Linguistics.

BAAL Book Prize verður á hvørjum ári latin "framúrskarandi bók á nýtslumálvísindaliga økinum", og bókin hjá Annu-Elisabeth Migration, Adult Language Learning and Multilingualism: Critical Sociolinguistics Research with New Speakers of Faroese er nú ein av tilsamans fýra bókum, sum kunnnu vinna heiðurslønina til heystar.

Hinar tríggjar bøkurnar, sum eru í uppskoti at fáa BAAL, eru:

• Listening Without Borders: Creating Spaces for Encountering Difference, Magdalena Kubanyiova og Parinita Shetty
• Monolingual Policies in Multilingual Schools, Jürgen Jaspers
• The Bloomsbury Handbook of Linguistic Landscapes, Robert Blackwood, Stefania Tufi and Will Amos

Annars hevur Anna-Elisabeth Holm júst fingið eina millión krónur í granskingarstuðli frá Granskingarráðnum, sum umsitir fæið í Frítíðargrunninum. Verkætlanin, sum nú kann fremjast í verki, eitur Mál, inklusjón og arbeiðsmarknaður.

Hjartaliga til lukku, Anna- Elisabeth, og bestu eydnu við øllum!

Birgir Kruse gjørdi í fjør samrøðu við Annu-Elisabeth Holm til heimasíðuna hjá Norðurlendska Netverkinum fyri Lívlanga Læring. Lesið samrøðuna her. Myndin er haðani.

Ingi Rasmussen í Kringvarpi Føroya gjørdi í 2021 samrøðu við Annu-Elisabeth Holm um granskingina, sum m.a. vísti, at sera lítil partur av tilflytarum í Føroyum, sum ikki eru av norðurlendskum uppruna, kann brúka ta hægri útbúgvingina, ið tey hava við sær higar.

Lurtið eftir samrøðuni her.