Arbeiðið at gera Faroese Online er byrjað
Hetta er undirvísingartilfar fyri útlendingar, og er talan um interaktivt tilfar, har tað fer at bera til at gera venjingar, lurta eftir ljóðfílum og síggja video.
Verkætlanin Faroese Online verður gjørd í samstarvi við granskarar og undirvísarar á Háskóla Íslands og Helsinki Universiteti, og fer Faroese Online at byggja á tað tilsvarandi Icelandic Online. Fyrst verður eitt grundleggjandi skeið gjørt. Íslendingar kalla tað Bjargir. Enn er einki føroyskt heiti fingið, men hetta er eitt slag av fyrstuhjálp, sum útlendingurin fær í føroyskum. Eftir ætlan verður fyrsta stig liðugt í 2017.
Projektleiðari í Føroyum er dr. Hjalmar P. Petersen, og John Mikkelsen er vísindaligur medarbeiðari. Millum íslendingarnar, sum arbeiða og hava arbeitt við interaktivum undirvísingartilfari í Íslandi, eru Birna, Úlvar og Kolbrún, sum øll síggjast á myndini saman við John og Patrick. Hjalmar vantar á myndini.
