Bogi Bech Jensen adjungeraður professari

Bogi Bech Jensen, sum hevur verið professari í orkuverkfrøði á Náttúruvísindadeildini síðan 1. januar 2014, fer nú í annað starv. Hann tekur við starvi sum rektari á Skúladeplinum í Marknagili 1. august 2015.

Bogi fer tó framhaldandi at hava tilknýti til Setrið, tí frá 1. august 2015 verður hann adjungeraður professari í orkuverkfrøði á Náttúruvísindadeildini. Hetta ber í sær, at hann m.a. fer at stuðla undir menning av útbúgving og gransking innan orkuverkfrøði og at hava fakliga ábyrgd av ávísum skeiðum í útbúgving av orkuverkfrøðingum. Somuleiðis fer hann í ein ávísan mun at kunna vegleiða og undirvísa í pørtum av orkuverkfrøðiútbúgvingini á Setrinum.

Vit ynskja Boga til lukku við rektarastarvinum á Skúladeplinum í Marknagili og við adjungeraða professoratinum.