Fakligheit, trivnaður og felagsskapur í dagsins skúla

Endamálið við stóra átakinum er at skapa eitt felags fakligt mál og at byggja sterkari brúgv millum gerandisdagin í skúlanum og granskingina, sum fer fram á økinum. 

Hetta er fyrstu ferð, at Nám og Námsvísindadeildin á Fróðskaparsetri Føroya fara undir slíkt skipað samstarv við tí stevnumiði at menna tað fakliga í skúlanum saman.

Og hetta ber í sær, at alt skúlaverkið verður savnað fyri at styrkja fakligheitina, trivnaðin og felagsskapin í skúlanum, sum stútt og støðugt broytist í tí alsamt umskiftiliga samfelagnum.

Ítøkiliga verður samstarvið skipað sum eitt faklig heildartiltak kring landið, har arbeiðast skal við hesum spurningum:

Hvørjar eru avbjóðingarnar, hvat krevst, og hvørjar broytingar krevjast av tí professionella í nútímans skúlanum? 

- Hetta heildartiltak meta vit vera eitt stig fram á leið at styrkja um samstarv millum skúlapolitikk, ráðgeving, gransking, undirvísing og skúlapraksis – og tað allarbesta er, at vit við hesum heildartiltaki kunnu møtast á skúlagólvi at umrøða og viðgera týðandi skúlaviðurskifti, siga fyriskipararnir (sí myndina).

- Útgangsstøðið er jú, at skúlin sum livandi felagsskapur mennist best, tá framburður verður skapaður og mentur í felag, og har bygdar vera brýr millum gransking og gerandisdagin, siga tey.

Tískil er endamálið við heildartiltakinum ikki “bara” faklig kveiking, men eisini, at øll, sum hvønn dag mynda skúlan í gerandisdegnum úr hvør sínum staði, menna skúlan saman. Við øðrum orðum er tiltakið eitt vitanar- og kveikingarrúm, har ynskið er at sáa fræ, ið, sum frá líður, kann vaksa til ítøkiligar broytingar og batar á økjum, har tørvurin er.

Rundferð verður til átta skúlar kring landið, har ein heilur fakligur dagur verður fyri starvsfólk í skúlunum í lokaløkjunum har. 

Dagurin verður skipaður soleiðis, at byrjað verður við felags fyrilestri um tey evni, sum sett eru á skránna fyri dagin. Síðani fara luttakararnir í verkstovur, har teir sjálvir arbeiða virkið við fakligu menningini. Hvørt starvsfólk luttekur í tveimum verkstovum, har dentur verður lagdur á íblástur, praksis og kjak. Dagurin endar við, at tikið verður samanum.

Les alla greinina í Skúlablaði nr 6, 2025. Í greinini eru lýsingar av øllum, sum fer fram á heildartiltakinum (krevur hald).