Nicolai Mohr Balle, verkætlanarstjóri í Talgildu Føroyum undir Gjaldstovuni, handar Akseli V. Johannesen, landsstýrismanni, forkanning um vitlíki í Føroyum
FMR fingið forkanning um vitlíki í Føroyum
Aksel V. Johannesen, landsstýrismaður, fekk í dag forkanningina um vitlíki í Føroyum, sum ráðgevarar frá fyritøkunum Usable og Vitlíkisstovuni hava gjørt saman við fakfólki á Gjaldstovuni
Arbeiðssetningurin fyri forkanningina var at orða eina visjón, sum kann skapa eina greiða felags kós fyri, hvussu Føroyar skulu brúka og gagnnýta vitlíki, og at vera grundarlag fyri eini heildarætlan fyri alt samfelagið.
- Vit hava ein greiðan politiskan vilja til at gagnnýta vitlíki til fyrimun fyri samfelag okkara. Tað snýr seg um at hava visjónina og at seta kósina við einari heildarætlan, ið tryggjar mál, mentan og búskap, samstundis sum vit skapa vøkstur fyri allar Føroyar, segði Aksel V. Johannesen í sambandi við handanina av forkanningini.
Forkanningin vísir, at áhugin fyri vitlíki er stórur og møguleikarnir nógvir. Samstundis er tørvur á greiðari leiðbeining, sterkari førleikum og betri samstarvi, um tøknin skal brúkast trygt og koma øllum til góðar.
Fyri fólkið í Føroyum snýr tað seg um fatan og førleikar, eina framhaldandi sterka vinnu, búskaparvøkstur, góðar almennar tænastur, og at tryggja, at føroyskt verður eitt virkið mál í nýggju tøknini.
Forkanningin byggir á verkstovur, samrøður og greiningar, har umboð fyri vinnu, fakfeløg, útbúgvingarstovnar og almennar stovnar hava borið fram síni sjónarmið. Millum luttakararnar vóru MEGD, Fróðskaparsetur Føroya og Undirvísingarstýrið.
Næsta stigið er, at Gjaldstovan fer undir at gera eina heildarætlan. Forkanningin mælir til, at farið verður víðari við royndarverkætlanum við stovnum og kommunum, og at ein samskipandi vitlíkiseind verður skipað til at stuðla arbeiðinum tvørtur um land, kommunur og vinnu.
