Frá heimsins minsta universiteti til heimsins størstu fyritøku

Khanh Duc Nguyen hevur arbeitt við eini PhD verkætlan innan jarðalisfrøði á Náttúruvísindadeildini. Longu áðrenn PhD verkætlanin verður liðug í 2011 hevur Khanh fingið starv hjá eini av heimsins størstu fyritøkum – Royal Dutch Shell.

Khanh Duc Nguyen hevur arbeitt við eini PhD verkætlan innan jarðalisfrøði á Náttúruvísindadeildini (NVD) á Fróðskaparsetrinum, har Jim Brown, professari er vegleiðari hansara. Væntandi verður PhD verkætlanin liðug í 2011. Men longu áðrenn tað hevur Khanh fingið starv hjá eini av heimsins størstu fyritøkum – Royal Dutch Shell.

Khanh Duc Nguyen kom á NVD í September 2006, eftir at hava lokið masterprógv í kolvetnis jarðvísindum á universitetinum í Tróndheimi, NTNU. Hann hevur umboðað NVD kring allan heimin við luttøku og framløgum á altjóða vísindaligum ráðstevnum, sum t.d. American Association of Petroleum (AAPG) í Athen (2007), Society of Exploration Geophysicist (SEG) í Beijing (2008), European Association of Geoscientist and Engineer (EAGE) í Amsterdam (2009), International Petroleum Technology Conference (IPTC) í Doha, Qatar (2009) og SEG & EAGE í St. Petersburg (2010).

Khanh bleiv senior jarðalisfrøðingur hjá Shell Upstream International Europe (UIE) í oktober 2010. Hann kom at luttaka í einum arbeiðsbólki í Stavanger, sum arbeiddi við kanningum av kolvetnisbrunnum (reservoir’um). Arbeiðið fevndi um seismiskar kanningar, greining av brunnum og stuðul til m.a. arbeiði við leitiboringum. Shell hevur arbeitt við leitingum og framleitt olju og gass í meir enn eina øld og luttikið í nøkrum av heimsins størstu og mest fjøltáttaðu orkuverkætlanum. Við sínum umleið 101.000 fólkum í meir enn 90 londum og økjum varð Shell mett sum nummar eitt í “the Global 500 list” í 2009. Hetta er ein árlig meting um hvørji feløg eru størst í heiminum.

Enn eitt dømi um, at gransking og útbúgving á Fróðskaparsetrinum eru á altjóða dyggum støði.