Heðin Ingi Abrahamsen staðið ph.d.
Seinnapartin fekk Heðin Ingi Arbahamsen ph.d.-heitið, tá hann hevði vart sína ritgerð, sum eitur "Numerical nearshore model of waves and wave generated currents”
- Hetta hevur høgan altjóða standard!
Tað var eitt av skotsmálunum, sum Heðin Ingi Abrahamsen fekk, tá hann seinnapartin vardi sína ph.d.-ritgerð í Kongshøll á Vestaru Bryggju í Havn.
Heðin hevur nú fingið ph.d.-heitið eftir at hava tikið granskaraútbúgving við starvi hjá Firum og innskriving á Náttúruvísindadeildini á Fróðskaparsetri Føroya.
Bárður A. Niclasen og Knud Simonsen, lektarar á Fróðskaparsetri Føroya, vóru høvuðsvegleiðarar, Gunnvør á Norði og Tróndur J. Kragesteen, vinnuvegleiðarar á Firum, og Øystein Patursson, lektari á Fróðskaparsetri Føroya, var hjávegleiðari.
Í metingarnevndini vóru Karin Margretha H. Larsen, adjungeraður lektari á Fróðskaparsetri Føroya (forfólk), Lars Ganzel, lektari á NTNU, og Harry B. Bingham, professari á DTU.
Í samandráttinum av ph.d.-ritgerðini skrivar Heðin Ingi Abrahamsen soleiðis:
Avmarkaða talið av vardum økjum fær alarar at flyta út á meira ábard øki. Hesi øki hava tó avbjóðingar við høgari aldu og hørðum ráki.
Hóast útgerðin er gjørd til at tola slíkt umhvørvi, kunnu umhvørvisligar avbjóðingar framvegis hava neiliga ávirkan á heilsu og trivnað hjá fiskinum.
Ringar við flótiringi í vatnskorpuni og søkkringi í botninum eru teir mest vanliga brúktu í laksaaling. Í umhvørvi við nógvari aldu og hørðum ráki verður søkkringurin lyftur upp, og tann treingingin kann seta lív og heilsu hjá fiskinum í vanda.
Høvuðsendamálið er at menna ein numeriskan myndil, sum kann vísa undir hvørjum um støðum aldugjørt rák er væntandi.
Verkætlanin kannar hættir at máta og rokna út rúmið í alinótini.
Mátingar á alibrúkinum á Sandsvág vísa hart rák, serliga í tíðarskeiðum við høgari aldu. Samanhangurin millum alduhædd og aldugjørt rák, og eisini millum aldu, rák og rúmbroyting í alinótini, verður kannaður.
Harumframt verður frekvensspektrið av rúm broytingunum greinað. Numerisk myndul av aldugjørdum rákið tvørtur um eina grynnu verður kannaður, og síðani fluttur yvir á Sandsvág.
Fyrst verður aldugjørt rák aftan fyri eina grynnu myndlað numeriskt í einum royndarbrunni. Síðani verður brunnurin við grinnuni stigaður upp til verðuliga stødd.
Í einari aðrari roynd verður grynnan broytt til eitt nes, fyri betri at umboða viðurskiftini á Sandsvág. At enda verður ein numeriskur myndil gjørdur, ið byggir á botnmátingar í økinum kring Sandsvág.
Ritgerðin er tøk á Pure-vanganum hjá Heðini.
Vit ynskja Heðini hjartaliga til lukku við ph.d.-heitinum!
