Íslendskir rektarar vitjaðu Fróðskaparsetrið

Týsdagin 17. apríl høvdu rektararnir fyri teir tríggjar útbúgvingarstovnarnar, Fróðskaparsetur Føroya, Føroya Læraraskúla og Føroya Sjúkrarøktarfrøðiskúla, vitjan úr íslandi. Talan var um Kristín Ingolfsdóttir, rektara á Háskóla Íslands og Ólaf Proppé, rektara á Kennaraháskóla Íslands; íslendska læraraskúlan.

Íslendsku rektararnir vóru komnir til Føroya at greiða frá teirra royndum við arbeiðnum at leggja Háskólan og Kennaraháskólan saman í ein stovn. Fundurin varð hildin á rektaraskrivstovuni á Fróðskaparsetri Føroya, men eisini var tíð hjá íslendska ferðalagnum at síggja eitt sindur av Havnini í góðveðrinum 17. apríl.

Íslendsku rektararnir vóru boðin til Føroya av Mentamáladeildini á Mentamálaráðnum. Umframt Jóannes Dalsgaard, deildarstjóra á Mentamáladeildini, vóru eisini Kristina Sjóvará Jacobsen og Jørgen Meitelberg fulltrúar, við á fundinum.