Lestrarstudningurin veksur við 1000 krónum

21. oktober verður fyrsta viðgerð í løgtinginum av uppskotinum um at seta lestrarstudningin upp við 1000 krónum um mánaðin

Djóni Nolsøe Joensen, landsstýrismaður í útbúgvingarmálum, hevur lagt lógaruppskot fyri tingið, sum skal geva lesandi á hægri útbúgvingum í Føroyum betri fíggjarlig kor.

Verður uppskotið samtykt fara lesandi at fáa 1000 krónur meira um mánaðin í lestrarstudningi, so mánaðarliga upphæddin frá 1. august 2026 verður 6.139 krónur. Síðani skal studningurin javnast sohvørt - javningarprosentið í ár var 3,6 prosent.

Í viðmerkingunum til lógaruppskotið stendur soleiðis:

"Samgongan hevur sett sær fyri at bøta um korini hjá teimum lesandi í Føroyum, soleiðis at fleiri velja at taka útbúgving her heima. Tískil er ætlanin at bøta um umstøðurnar hjá teimum lesandi á hægri lesnaði í Føroyum við eitt nú at hækka lestrarstuðulin".