Masterprógv í stjórnmálafrøði handað á Søgu- og samfelagsdeildini

Fríggjadagin helt Anna Paulina Leo Olsen masterfyrilestur í stjórnmálafrøði á Søgu- og samfelagsdeildini.

Í framløguni tók Anna støði í teimum veðurlagsbroytingunum, sum gera, at ísurin í Arktis bráðnar. Hettar hevur við sær, at nýggjar siglingarleiðir tvørtur um Norðpólin gerast veruleiki, og at tilfeingi, sum annars ikki var atkomuligt, tí tað lá undir ísi, møguliga verður tøkt í næstu framtíð. Hetta hevur havt við sær, at Arktis er komið í ein geopolitiskan ‘brennidepil’.
 
Tað eru hesar umhvørvisbroytingar og tær avleiddu broytingarnar í teimum politisku strukturunum í Arktis, sum Anna hevur sett sær fyri at kanna í sínari serritgerð, og undir framløguni viðgjørdi Anna spurningin, um økta kappingin í Arktis fór at føra til eitt nýtt miðeystur, ella um tað heldur fór at føra til økt samstarv.

Anna hevur við hesum fyrilestrinum lokið masterprógv í sjórnmálafrøði, og ynskja vit henni alt tað besta framyvir.