University of the Faroe Islands
Lesandi
Starvsfólk
Setrið
IMG_3718.JPG
04.12.2018
Setrið Námsvísindadeildin

Námsvísindadeildin skipað fyri fakdidaktiskum skeiði í fremmandamálum

Námsvísindadeildin skipaði í døgunum 19.-21. november fyri fakdidaktiskum internatskeiði fyri miðnámsskúlalærarar á Gjáargarði í fremmandamálunum: enskum, fronskum og sponskum.

Skeiðið er liður í NÚ (námsfrøðilig útbúgving), sum er nýggj útbúgving á Fróðskaparsetri Føroya, sum í løtuni verður arbeitt við at fáa grundfest og sett í fastar karmar á Námsvísindadeildini.

Vit hava ásannað, at vit við avmarkaðum tali av kandidatum mugu leggja fak saman, sum hava líkan fakdidaktikk. Hetta var í hesum førinum gjørt við felags skeiði fyri øll fremmandamálini. Helmingurin av skeiðinum snúði seg um fremmandamálsdidaktikk sum heild og hin helmingurin um einstøku mállærugreinina.

Katrin Hammer úr Skúvoy, sum í mong ár hevur verið skeiðshaldari á NÚ skeiðum í Føroyum og hevur royndir sum undirvísari á Syddansk Universiteti á pedagogikum útbúgvingini har, hevði høvuðsábyrgdina av innihaldinum í skeiðinum. Hon stóð eisini fyri undirvísingini í enskum fakdidaktikki. Saman við henni undirvísti Tina Lund Hansen, master í gymnasiedidaktikki. Hon undirvísti í sponskum fakdidaktikki og saman við Katrini í fremmandamálsdidaktikki. Annika Arnsteinsdóttir Nielsen, sum hevur nógvar undirvísingarroyndir á gymnasialum miðnámi, tók sær av fronskum fakdidaktikki. Kalpana Vijayavarathan og Vár í Ólavsstovu frá Námsvísindadeildini vóru við sum eygleiðarar og fyriskiparar, og Námsvísindadeildin hevði evstu fakligu ábyrgdina.

Ætlanin er framyvir, at Námsvísindadeildin skal skipa fyri fakdidaktiskum skeiðum í øllum lærugreinum á miðnámsskúlaøkinum. Sjøtul er settur á. Umframt hetta skeiðið í fremmandamálsdidaktikki við 23 luttakarum, hava verið hildin tvey NIS-skeið, sum er námsfrøðilig innleiðsla til teirra, sum á fyrsta sinni skulu undirvísa á miðnámsskúla, og fyrireiking er farin í gongd til fakdidaktiskt skeið í føroyskum og donskum undir felags heitinum: Móðurmáls- og grannamálsdidaktikkur. Eisini her verður ein partur av skeiðinum felags og annar partur verður hvør sær.

Onnur tíðindi

Fleiri tíðindi
  1. Próvtøkuótti 13.11.2025 (002)

    Opin fyrilestur á netinum um próvtøkuótta

  2. Rógvi Olavson Staðið Phd 13112026

    Væleydnað ph.d.-verja hjá Rógva

  3. Forsíða Klipt

    Setrið byggir brúgv til miðnám