Nikotin- og tubbaksráðstevna
Heilsustýrið og Fróðskaparsetur Føroya skipa hósdagin 23. oktober fyri ráðstevnu um nikotin og tubbak. Ráðstevnan, sum verður í Kongshøll frá klokkan 9-12, er almenn og ókeypis, men krevur tilmelding á atgongumerki.fo
Aðalmálið við ráðstevnuni er, at eingin skal verða krøktur av nikotini og at fyribyrgja, at børn og ung tendra sína fyrstu sigarett. Gerst tú bundin av nikotini, eru sannlíkindini fyri, at tú eisini gerst roykjari, nógv størri.
Ráðstevnan vendir sær til politisku skipanina, myndugleikar, fólkaskúlar, miðnám, leiðslur, aðalráð, ítróttafeløg, handilsvinnu og stovnar. Málbólkurin er eisini øll, ið vilja vita meira um vansarnar við nikotini og tubbaki, og sum arbeiða fyri einum nikotin- og tubbaksfríum Føroyum.
Høvuðsrøðari er Charlotta Pisinger, professari í nikotin- og tubbaksfyribyrging, sum í mong ár hevur verið ein ótroyttilig serfrøðingarødd á økinum.
Á ráðstevnuni fara vit millum annað at hoyra um, hvørjar tubbaks- og nikotinvørur eru á marknaðinum, hví nýggju nikotinvørurnar eru ein trupulleiki, innflutningsmynstur í Føroyum, hvønn leiklut tubbaks- og nikotinídnaðurin hevur og á hvønn hátt tey ungu ávirkast av nýggju nikotinvørunum.
Eisini hoyra vit um fyribyrgjandi átøk, sum virka í øðrum londum, og hvussu tubbaks- og nikotinídnaðurin roynir at svara aftur. Harafturat hoyra vit um, hvussu vit bygnaðarliga kunnu hjálpa teimum sera krøktu ungu úr sínum nikotinbundinskapi.
Heilsustýrið hevur stuttan film um, hvussu nikotin skaðar heilan.
Filmurin sæst her.
SKRÁIN
Kl. 09.00 Vælkomin, May-Britt Skoradal, varadekanur á Deildini fyri Heilsu- og Sjúkrarøktarvísindi, Fróðskaparsetur Føroya & Noomi Gregersen, ph.d., leiðari í Heilsustýrinum
Kl. 09.05 Súsanna Bertholdsen, landstýriskvinna í heilsumálum setur ráðstevnuna
Kl. 09.10 Tað smakkar av bommi, men oyðileggur barnaheilan, Charlotta Pisinger, professari í tubbaks- og nikotinfyrbyrging, Center for Klinisk Forskning og Forebyggelse á Bispebjerg-Frederiksberg Universitetshospitali
Kl. 09.50 Innflutningur, rák og snúsvanar millum ung, Snorri Patursson, fólkaheilsusamskipari, Heilsustýrið
Kl. 10.05 Nikotin- og tubbaksnýtsla millum skúlanæmingar - ein løtumynd, Daisy Iversen, SSP- ráðgevi, Skúli, Sosialir myndugleikar og Politi
Kl. 10.20 Steðgur & netverkan
Kl. 10.40 Nikotin- & tubbaksorðaskifti, breitt umboðandi panel
Kl. 11.20 Tað er nógv, sum vit kunnu gera – saman, Charlotta Pisinger, professari í tubbaks- og nikotinfyrbyrging, Center for Klinisk Forskning og Forebyggelse á Bispebjerg-Frederiksberg Universitetshospitali
Kl. 12.00 Takk fyri í dag
Orðstýrari er Óluva Zachariasen
Melda til ókeypis ráðstevnuna her.
