Nú verður stóra ráðstevnan um Føroyskt sum annaðmál
Ráðstevnan í Kongshøll á Fróðskaparsetrinum um Føroyskt sum annaðmál verður fríggjadagin 22. mars - sí skránna her
Mentanarliga og málsliga eru Føroyar fjølbroyttar, og tað setir krøv til okkara skúlaverk og myndugleikar at fylgja við. Tí verður skipað fyri ráðstevnu um tað lutfalsliga nýggja fakøkið í Føroyum, sum eitur Føroyskt sum annaðmál.
Hetta er eitt fak, sum er neyðugt fyri at geva fólki í Føroyum, sum ikki hava føroyskt sum móðurmál, nøktandi undirvísing og harvið amboð til at fóta sær væl í okkara samfelag til gagns fyri øll.
Fyriskiparar eru umboð fyri Fróðskaparsetur Føroya og lærarar, sum nýliga - og sum teir fyrstu - hava staðið Diplomútbúgving í føroyskum sum annaðmál á Føroyamálsdeildini á Setrinum.
Á ráðstevnuni verða fyrilestrar, styttri framløgur, uppsløg og samrøður, sum bæði snúgva seg um politikk og praksis á økinum.
Málbólkurin fyri hesa ráðstevnu eru skúlafólk og lesandi á øllum stigum, eisini leiðslustigi, umframt politikarar, sum skulu seta karmarnar fyri skúlaverkið nú og í framtíðini.
Tey, sum luttaka, fáa innlit í:
• hvat føroyskt sum eitt annaðmál er
• altjóða og føroyska gransking
• karmar og fyriskipan av økinum
• fleirmælisdidaktikk og fleirmælta málmenning
• serligar avbjóðingar og serføroysk viðurskifti, ið eru heft at tí at læra føroyskt í einum fleirmæltum veruleika
Latið er nú aftur fyri tilmeldingum.
Sí skránna her.
