Nýggjur lektari í føroyskari málfrøði

Hjalmar P. Petersen, dr. phil. er settur í lektarastarv í føroyskari málfrøði á Megindeildini fyri hugvísindi, samfelagsvísindi og námsvísindi.

Hjalmar hevur lisið føroyskt á FMD, norrøna filologi í Keypmannahavn, málvísindi í Íslandi og málvísindadeildini á Yale University. Hann hevur granskað í føroyskum í fleiri ár, m.a. á Sonderforchungsbereich Mehrsprachigkeit í Hamborg frá 2005-2011, og hevur skrivað fleiri greinar um føroyskt. Eisini hevur hann givið út bøkur um føroyskt. Ein er 'The Dynamics of Faroese Danish Language Contact', sum Universitaetsverlag Winter í Heidelberg gav út í 2010.

Í nýggja starvinum fer hann umframt at granska og undirvísa í føroyskum máli at skipa fyri skeiði í føroyskum fyri útlendingar og at leggja lunnar undir gransking og undirvísing í fjølmiðlafrøði.