Nýggjur rektari til Fróðskaparsetur Føroya

Søkt verður nú eftir nýggjum rektara til Fróðskaparsetur Føroya.

Rektarin hevur um hendi dagligu leiðsluna av Fróðskaparsetrinum. Førleikakrøvini til rektarastarvið eru m.a. royndir í leiðslu, royndir og innlit í útbúgvingarøkið, royndir og kunnleika um granskingarøkið, umframt skil fyri samspælinum millum Fróðskaparsetrið og samfelagið sum heild.

Fróðskaparsetur Føroya, Føroya Læraraskúli og Sjúkrarøktarfrøðiskúli Føroya vórðu løgd saman frá 1. august 2008 at rokna, og seinni eru Altjóða Skrivstovan og Granskingardepilin fyri Samfelagsmenning løgd afturat Fróðskaparsetrinum. Møguliga verða útbúgvingarnar til skipsførara og maskinmeistara eisini lagdar afturat Fróðskaparsetrinum, tá ið tær verða uppstigaðar til bachelor stig.

Samanleggingar og broytt krøv til Fróðskaparsetur Føroya viðføra, at nakrar serligar avbjóðingar standa fyri framman. Komandi rektarin skal m.a. standa á odda fyri:

• at menna og seta í verk strategi og mál,
• at tryggja undirtøku fyri nýggja samleikanum,
• at menna eina virkismentan, ið er felags fyri alt Fróðskaparsetur Føroya,
• at tryggja eina skynsama javnvág millum útbúgvingartilboð og gransking,
• at menna samstarv við útlendsk universitet um útbúgving og gransking,
• at tryggja eitt gott og gevandi samstarv við myndugleikar, skúlar og granskingarstovnar.

Á Fróðskaparsetri Føroya eru umleið 90 ársverk og rakstrarjáttanin eru umleið 70 mió. kr. í 2011. Umleið 500 lesandi eru á Fróðskaparsetrinum, har útbúgvingarnar eru: sjúkrarøktarfrøði, lærari, námsfrøði, stjórnmálafrøði, samfelagsfrøði, søga, føroyskt, jarð- og havfrøði, lívfrøði og KT verkfrøði.

Jóan Pauli Joensen hevur eftir áheitan frá stýrinum røkt starvið sum rektari síðani nýggja lógin um Fróðskaparsetur Føroya kom í gildi í 2008. Jóan Pauli Joensen fer at røkja starvið til nýggjur rektari tekur við og fer eisini at verða nýggja rektaranum til hjálpar fyrstu tíðina.

Lýsing v.m. er at finna á heimasíðuni www.setur.fo

bæði á føroyskum og donskum