Nýtt tilboð: Blív miðnámslærari í tveimum fakum upp á fimm ár

Nú verður lættari og skjótari at gerast miðnámsskúlalærari í tveimum fakum, tí Fróðskaparsetur Føroya bjóðar nú lesandi tvífakligt nám í søgu og samfelagsfrøði

Ein nýggjur og meira effektivur útbúgvingarleistur verður nú settur í verk á Fróðskaparsetri Føroya, har lesandi kunnu fáa tvífakliga útbúgving í annaðhvørt søgu og samfelagsfrøði ella samfelagsfrøði og søgu.

Hesar útbúgvingarnar geva fullan førleika til at undirvísa í báðum fakum á miðnámi eftir fimm ára lestur.

Higartil hava lesandi annars verið noydd til at taka hjánám aftrat síni fimm ára útbúgving fyri at kunna undirvísa í tveimum fakum í miðnámsskúlum.

Nýggju tvífakligu námini avmarka ikki møguleikarnar hjá lesandi í mun til gomlu eittfakligu høvuðsnámini, tí nýggju útbúgvingarnar geva kandidatunum somu møguleikar fyri at fara granskingarvegin.

Formligu førleikarnir fyri at kunna fara undir ph.d.-lestur innan fyri høvuðsnámið fáast eisini við nýggju útbúgvingunum.

Vil tú hava høvuðsnám í søgu og hjánám í samfelagsfrøði, so søkir tú inn á útbúgvingina her.

Vilt tú hava høvuðsnám í samfelagsfrøði við hjánámi í søgu, so søkir tú inn á útbúgvingina her.