University of the Faroe Islands
Lesandi
Starvsfólk
Setrið
Heimsins Nalvi

Perman á bókini Heimsins nalvi (Foto: Permumynd: Sámal Blak)

20.06.2025
Søgu- og samfelagsdeildin Fróðskapur

Nýtt upplag av bókini Heimsins nalvi tøkt

Fyrsta upplagið av Heimsins nalvi, bókini um føroyskan uttanríkispolitikk, sum kom út í april, var útselt eftir stutta tíð. Bókin er nú prentað aftur í 2. upplagi og tøk í bókabúðunum.  

Bókin kallast Heimsins nalvi – Føroyskur uttanríkispolitikkur í fjórðingsøld og viðger uttanríkispolitisku støðu Føroya úr einum breiðum sjónarhorni.

Seytjan høvundar við ymiskum bakgrundum lýsa og greina føroysk uttanríkisviðurskifti úr ymsum sjónarhornum. Bókin viðger m.a. vinnuliga og tjóðskaparliga menning í 19. øld, heimskríggj og samráðingar um fiskimørk undir kalda krígnum, fyrstu sendistovurnar um aldarskiftið, yvirtøkur av málsøkjum og hvussu uttanríkispolitiska virksemið áhaldandi er víðkað í 21. øld. Millum høvundarnar eru granskarar, embætisfólk og journalistar, sum allir hava lagt seg eftir at skriva til almenningin.

Ritstjórnað hava Regin Winter Poulsen, Jens Christian Svabo Justinussen, Rógvi Olavson og Heini í Skorini.

Hetta er fyrsta bók, sum viðgerð føroyskan uttanríkispolitikk burturav. Og evnið gerst alsamt meiri átrokandi, nú heimurin er í broyting. Bókin er ætlað øllum, ið forvitnast um støðu Føroya í heiminum, og hvagar leið Føroya gongur.

Í sambandi við útgávuna tann 2. apríl var útgávutiltak á Søgu- og samfelagsdeildini við framløgum um bókina. Har bar Herálvur Joensen, aðalstjóri í Uttanríkisráðnum, fram tøkk til Árna Olafsson, sum í mong harrans ár arbeiddi sum serkønur í føroyskum viðurskiftum í danska Uttanríkisráðnum. Røðan kann lesast her.

Onnur tíðindi

Fleiri tíðindi
  1. Próvtøkuótti 13.11.2025 (002)

    Opin fyrilestur á netinum um próvtøkuótta

  2. Rógvi Olavson Staðið Phd 13112026

    Væleydnað ph.d.-verja hjá Rógva

  3. Forsíða Klipt

    Setrið byggir brúgv til miðnám