Organisatións-menning á leiðslustigi

22. mars er evstamark at søkja pláss á stakskeiði í organisatiónsmenning á masterstigi, sum gevur tær førleikar at sniðgeva, íverkseta og eftirmeta organisatiónsmenning. Skeiðið er skipað sum vikuskiftislestur

Við klassiskum og nútímans ástøði og gransking í organisatiónsmenning veita vit her eitt skeið til tín, sum hevur tørv á at duga at menna organisatiónina.

Eftir lokið skeið skal tann lesandi duga at:

• Brúka gransking og vitan um organisatiónsmenning

• Greiða frá, greina og meta um týdningin av organisatiónsmenning

• Fáa starvsfólkahópin at skilja, hví organisatiónsmenning er neyðug

• Lýsa, hvussu ein í verki arbeiðir við Organisatoriskari Interventión (OI), t.v.s. menna, seta í verk og eftirmeta eitt OI- átak, eisini í føroyskum høpi

• Greiða frá teimum ymisku fakligu hugtøkunum og fyribrigdunum, sum eru knýtt at nútímans organisatiónsmenning, so sum capacity-building, t.v.s. leiðsluátøk, ið hava við sær, at starvsfólk trívast og mennast, og á hendan hátt økja um evnini hjá organisatiónini at røkka sínum málum

• Skilja ástøði undir lærandi stovni og vísa í verki, hvussu ein leiðir lærandi almennar og privatar organisatiónir

• Handfara og skilja mótstøðu í starvsfólkahópinum í eini menningargongd 

G.G. Hetta er stakskeið, sum telur 7,5 ECTS og er eisini partur av leiðsluútbúgvingini, sum Fróðskaparsetur Føroya bjóðar út sum kandidatútbúgvingina, Master í Leiðslu og Skipan. Undirvísingin er skipað sum vikuskiftislestur, t.e. fríggjadag seinnapart og leygardag fyrrapart til tíðliga seinnapart.

Les meira um skeiðið her.

Kostnaður: 15.000 krónur

Undirvísing byrjar: 5. apríl

Skeiðið endar: 25. mai

Próvtøka: 19 juni

Umsóknarfreist: 22 mars 2024