Ph.d.-verja verður stroymd

Karin Jóhanna Leitisstein Knudsen lýsir í ph.d.-ritgerð persónlig og samfelagslig viðurskifti, ið eru avgerandi fyri, hví konur flyta úr Føroyum til Danmarkar

Í morgin fríggjadagin tann 9. september fer Karin Jóhanna Leitisstein Knudsen at verja ph.d.-ritgerðina 'Fending for Yourself - Women’s migration between the Faroe Islands and Denmark' – um konur, ið mugu flyta av landinum fyri at fáa umstøður at klára seg sjálvar.

Verjan, sum fer fram á enskum, verður í høllini í Vinnuháskúlanum, Nóatún 7, kl. 13 - stundisliga. Tiltakið verður eisini stroymt.

Seinastu árini hevur verið stúrt fyri rákinum í fólkasamansetingini í Føroyum. Røddir hava verið frammi um, at tað er ein avbjóðing fyri mentanarligu, búskaparligu og sosialu skipanina í føroyska samfelagnum, at tað serliga eru konufólk, ið flyta av landinum.

Endamálið við ph.d.-ritgerðini er at lýsa, hvat eyðkennir konurnar, sum flyta millum Føroyar og Danmark. Harafturat er endamálið seta orð á tað, sum eyðkennir tey samfelagsligu viðurskifti, sum tær flyta frá og til.

Vegleiðarar hava verið Jørgen Ole Bærenholdt, professari á RUC, og Malan Marnersdóttir, professari á Setrinum. Í próvnevndini eru Sharon Roseman, professari á Memorial University í New Foundlandi, Firouz Gaini, lektari á Setrinum og Kristine Juul, lektari á RUC.

Henda ph.d.-ritgerðin er úrslit av trý ára arbeiði hjá Karini Jóhonnu Leitisstein Knudsen, sum hevur verið innskrivað á Fróðskaparsetrinum og á RUC til tvífalt ph.d.-prógv. Hetta er ein samstarvsháttur, har bæði universitetini hava havt ábyrgd av ph.d.-náminum.

Karin Jóhanna er tann fyrsta á Fróðskaparsetri Føroya, ið er innskrivað á tveimum hægri lærustovnum í sambandi við skriving av ph.d.-ritgerð. Ph.d.-kandidatur, ið er innskrivaður á tveimum lærustovnum og sum fær ritgerðina góðkenda eftir at hava vart hana fyri ph.d.-heitið, fær prógv frá báðum lærustovnunum.

Ritgerðin er skrivað á enskum og hevur verið til skjals alment á Landsbókasavninum upp undir verjuna.