Ráðstevna um fátæk børn og ung í Norðurlondum

18. og 19. februar skipaði Nordic Welfare Centre fyri norðurlendskari ráðstevnu í Stokkhólmi um fátækadømi millum børn og ung undir heitinum "Children and Youth at Risk of Poverty - Nordic approaches to social mobility and remaining challenges"

Umboð úr øllum Norðurlondum vóru á ráðstevnuni, og úr flestu londunum luttóku bæði granskarar og embætisfólk.

Endamálið við ráðstevnuni var at skapa eitt styrkt granskingarsamstarv tvørtur um Norðurlond til tess at kortleggja, hvussu støðan við fátækadømi millum børn og ung er í teimum ymisku londunum og fyri neyvt at kunna samanbera tøl og granskingarúrslit tvørtur um landamørkini.

Úrslitini skulu nýtast til at seta í verk politisk tiltøk fyri at hjálpa børnum og ungum, ið liva í fátækadømi ella í fátækaváða, eitt nú við fíggjarligum og praktiskum átøkum.

Eisini varð ein nýggj norðurlendsk frágreiðing um evnið løgd fram á ráðstevnuni.

Hon kann lesast her.  

Úr Føroyum luttóku Sigri M. Gaïni, ph.d. og námslektari á Námsvísindadeildini og Heri Petersen, fulltrúi í Almannamálaráðnum. Runa Preeti, ph.d. og námslektari á Søgu– og samfelagsdeildini er eisini ein partur av netverkinum, men hon fekk tíverri forfall.