Setursskrivstovan sum jarðhitaroyndarstøð

Jarðfeingi hevur gjørt Gróthúsini á Debesartrøð, har ið fyrisitingin hjá Fróðskaparsetri Føroya er, til royndarstøð fyri jarðhita

Nógvar jarðhitaboringar eru gjørdar í Føroyum seinastu 6-7 árini, tí jarðhiti verður í vaksandi mun brúktur til upphiting av húsum. Men vitanin um, hvat í roynd og veru ávirkar jarðhitan og hví, er framvegis sera avmarkað.

Nú skal ein nýggj royndarstøð við Setursskrivtovuna á Debesartrøð veita nøkur av svarunum.

Undir leiðslu av Janu Ólavsdóttir frá Jarðfeingi, sum er verkætlanarleiðari, eru trý jarðhol borað. Eitt, sum er 400 metrar djúpt, og tvey, sum eru 200 metrar. Holini eru gjørd á ymiskan hátt, soleiðis at granskararnir í verkætlanini kunnu samanbera ymiskar loysnir. Eitt av holunum er m.a. stoypt fyri at kanna, hvørja ávirkan tað kann hava.

Ein ørgrynna av tøkni og termometrum eru í holunum, sum 10. hvørt minutt skráseta hitamátingar fyri 10. hvønn metur.

Men endamálið er ikki bara at kanna hesi trý holini.

Royndarstøðin skal geva nýggja vitan um føroysku undirgrundina, so framtíðar jarðhitaskipanir kunnu gerast betri og tryggari. Úrslitini kunnu eisini gera tað lættari at velja røttu loysnina, áðrenn borað verður.

Við at savna dátur úr royndarstøðini á Debesartrøð fáa granskarar betri innlit í, hvussu føroyska bergið leiðir hita, hvussu vatn flytur seg í undirgrundini, og hvussu ymiskar boringar ávirka úrslitið.

Dátur frá royndarverkætlanini skulu savnast í fleiri ár, og vónin er, at royndarstøðin kann geva týdningarmikið grundarlag undir framtíðar gransking og menning av jarðhita í Føroyum.

Granskingarverkætlanin er stuðlað av Jarðfeingi, Heilsu- og orkumálaráðnum, Vinnumálaráðnum og Landsverki.

Lesið frágreiðing um jarðhitaverkætlanina HER.