Skeið í diabetes á Setrinum

Hetta vikuskiftið endar skeið á Fróðskaparsetri Føroya í diabetes fyri sjúkrarøktarfrøðingar, sum arbeiða í kommunulæknaskipanini.

Skeiðið kom í lag eftir áheitan frá Heilsumálaráðnum við støði í Heildarætlanini fyri diabetes, sum varð handað landsstýrismanninum í heilsumálum í juli í fjør. Heildarætlanin setti fram tilmæli um, at sjúklingar við typu 2 diabetes skuldu viðgerast í kommunulæknaskipanini. Sambært tilmælinum skuldu sjúkrarøktarfrøðingar hava ein týðandi leiklut í hesi viðgerð og tí varð mælt til, at sjúkrarøktarfrøðingar skuldu førleikamennast.

Heilsumálaráðið heitti í tí sambandi á Sjúkrarøktarfrøðideildina at taka hesa uppgávu upp á seg. Skeiðið byrjaði í mai og undirvíst hevur verið fríggjadag og leygardag sjey vikuskifti í alt. Innihaldið í undirvísingini hevur verið eftir skeiðslýsingini. (Skeiðslýsing sæst her).

26 sjúkrarøktarfrøðingar enda leygardagin skeiðið í diabetes á 10 ECTS og eru harvið førleikamentir til at taka hesa nýggju uppgávu upp á seg.