Størri atlit til genetiska fjølbroytni
Fiskivinnuumsitingarnar á Norðurlondum eiga at taka størri atlit til tað genetiska fjølbroytni í fiskinum, tá fiskað verður. Hetta var ein av niðurstøðunum á einari Norðurlendskari ráðstevnu, sum varð hildin í Öregrund í Svøríki í september mánað í 2006, har millum annað fólk frá Náttúruvísindadeildini á Fróðskaparsetrinum vóru við.
Økt ávirkan á fiskastovnar
Hesi seinastu árini er menniskjaskapta ávirkanin á fiskastovnar økt munandi. Hendan vaksandi ávirkanin stavar frá øktari veiðu á fiskastovnarnar, stórum vøkstir í alivinnuni, og frá mannaskaptum broytingum í náttúruni. Hesar broytingarnar ávirka tað genetiska fjøldbroytni hjá fiskinum, og tí eiga teir, ið umsita fiskastovnarnar í størri mun enn nú eisini at taka atlit til teir genetisku eginleikarnar hjá fiskinum og ikki bert stovnsstøddini og hvussu nógv fiskað verður.
Endamálið við fundinum
Endamálið við fundinum var at savna saman genetisku vitanina, ið vit í dag hava um tey týdningarmestu fiskasløgini, sum í dag verða veidd í teimum Norðurlendsku londunum. Á fundinum var eisini umrøtt, hvussu vit við nútímans genetiskum kanningum kunna umsita hesar fiskastovnar á ein burðardyggan og skilagóðan hátt.
Frágreiðingin
Ein frágreiðing er nú komin frá fundinum, og hevur hon heitið 'Genetic research on commercially exploited fish species in Nordic countries' . Her verður greitt frá teirri genetisku vitanini, sum vit í dag hava um teir týdningarmiklastu fiskastovnarnar í Norðurlondum, og víst verður samstundis á, hvar brúk er fyri at gera fleiri kanningar. Í frágreiðingini verður høvuðsdentur er lagdur á fimm evni:
- Ávísing av fiskastovnum og stovnsuppbýti.
- Útseting av fiski.
- Rýming úr alibrúkum.
- Broytingar skaptar av fiskiskapi.
- Ávirkanin frá umhvørvisbroytingum.
