UArctic: Shared Voices 2025 er útkomið

Tíðarritið Shared Voices 2025 er nú komið út við mongum spennandi greinum, sum øll hava atgongd til at lesa

Shared Voices er árliga tíðarritið hjá Uarctic-samstarvinum, har Fróðskaparsetur Føroya er við, og nú er fesk útgáva aftur tøk bæði á neti og prenti.

Í ár snýr tíðarritið seg um førleikamenning gjøgnum útbúgving og vitanardeiling.

Her eru søgur um at endurvekja mál hjá upprunafólki, víðka um luttøku í pólgransking við óformligari STEM-undirvísing, menna verkfrøðilestur í Grønlandi, gera starvsvenjingarætlan við permafrosti í miðdeplinum og nógvar aðrar søgur við.

Sum kunnugt verða Føroyar vertur fyri UArctic-kongressini næsta ár, har millum 600 og 1.000 altjóða luttakarar verða bodnir við, og har Arktis liggur undir luppinum. Luttakarar koma frá universitetum, felagsskapum og vinnulívi. Í tíðarritinum er eisini ein góð grein um hetta ódnartakið, sum stendur fyri durum í Føroyum.

Lesið tíðarritið her.