Opin skeið í føroyskum

Føroysk mállæra og rættskriving

Føroyamálsdeildin bjóðar út skeið í føroyskari mállæru og rættskriving. Skeiðini eru serliga ætlað teimum, sum í dagligum starvi hava tørv á at orða seg greitt og rætt

Endamálið er at menna evnini hjá skeiðsluttakarunum at brúka málið greitt, rætt og fjøltáttað. Arbeitt verður við at  økja tilvitanina um mál, málburð og ymsar stíllegur í málinum.

Boðin verða út trý skeið í føroyskari mállæru og rættskriving, I, II og III. Skeiðini eru framhald av hvørjum øðrum, men kunnu eisini takast sum sjálvstøðug skeið. Undirvíst verður tveir dagar um vikuna í 6 vikur. Treytað av, at innlatingar eru góðkendar og møtt er til minst 80 % av tímunum,  verður prógv latið fyri lokið skeið. Skeiðini kunnu ikki góðskrivast sum partur av BA-útbúgvingini í føroyskum. Treyt fyri luttøku er føroyskt á miðnámsskúlastigi ella samsvarandi.

Kostnaður: 1500 kr. fyri hvørt skeiðið.