B.Sc. í KT-verkfrøði

• Lestrartíð 3 ár
• Deild Náttúruvísindadeildin (NVD)
• Tal á Lesandi Uml. 30-40
• ECTS 180
• Lestrargjald (Fulltíðarlestur) Ókeypis fyri borgarar í danska ríkinum o.ø. Norðurlondum
• Lestrargjald (Stakgreinir) 200 DKK/ECTS

Endamál

Endamálið við útbúgvingini er at geva lesandi førleikar til eftir lokna útbúgving at virka sum KT-verkfrøðingar við førleikum innan KT-menning, forritan og verkætlanarleiðslu, KT-rakstur og -trygd, heimasíðuskipanir, spæl, lýsingar, appur, undirvísing í KT, dátuinnsavning og -viðgerð, teldusimulering o.a.

Bygnaður

Lærugreinir tiknar á øðrum universitetum kunnu eftir nærri meting í summum førum góðskrivast ístaðin fyri kravd skeið í útbúgvingini.

Gevið gætur: Fyrivarni verður tikið fyri broytingum, t.d. viðv. raðfylgju, skeiðsheitum og innihaldi í skeiðum.

* Skeið merkt við * eru fjarlestrarskeið frá Mittuniversitetinum.

Skipan av útbúgvingini

Í 3-ára bachelorútbúgvingini í KT-verkfrøði lærir ein um teldufrøði og forritan, stødd- og hagfrøði, algoritmur og dátubygnað, dátugrunnar og KT-skipanir, dátusamskifti umvegis føst og tráðleys net, internet og web-skipanir, dátuvísindi og tilgjørt vit (AI), forritanarverkfrøði og fíggjarstýring.

Útbúgvingin endar við eini bachelorritgerð.

Innihald

Høvuðsdenturin í útbúgvingini er á bygnað, nýtslu og forritan av KT-skipanum, t.d. tekniskum, fyrisitingarligum ella handilsligum telduskipanum.

Dentur verður lagdur á KT-evni, sum geva góðar vinnumøguleikar í føroyskari og altjóða KT-vinnu og samfelagsfyrisiting, t.d. web- og app-forritan, umframt dátuvísindi og tilgjørt vit (AI). Helstu forritanarmálini eru Python og Java, umframt onnur mál til web-skipanir (HTML/CSS/JavaScript/PHP/.NET MVC C#/SQL), og innan dátuvísindi og tilgjørt vit (R/Python).

Mesta undirvísingartilfarið er á enskum máli. Ein lærugrein (Fíggjarstýring) hevur danskt undirvísingartilfar, og ein lærugrein (Forritan til Android) er fjarlestur á enskum og svenskum máli frá Mittuniversitetinum (MIUN) í Svøríki, sum vanliga er skipað við stuðulsundirvísing í Føroyum.

Upptøkutreytir

Treyt fyri upptøku er bókligt (t.e. gymnasialt) miðnámsskúlaprógv við støddfrøði á B- ella A-stigi. Miðaltalið í nevndu lærugrein skal vera í minsta lagi 4 á B-stigi ella minst 2 á A-stigi eftir 7-talsstiganum. Hetta svarar til í minsta lagi 7 á B-stigi ella minst 6 á A-stigi eftir 13-talsstiganum. Um miðalpróvtalið ikki er nóg høgt ber til at søkja um upptøku gjøgnum kvotu 2, har aðrar fortreytir á javnsettum kunnleikastigi kunnu góðtakast eftir nærri meting. Góðir málførleikar í enskum, føroyskum (neyðugir) og skandinaviskum (ynskiligir).

Framtíðarmøguleikar

Sum KT-verkfrøðingur fært tú fjølbroyttar møguleikar at arbeiða við:

• KT-menning, forritan og verkætlanarleiðslu
• KT-rakstri og –trygd
• heimasíðuskipanum, spølum, lýsingum og appum
• undirvísing í KT, menning og rakstri av undirvísingaramboðum
• gransking og ráðgevandi verkfrøði, dátuinnsavning og -viðgerð, teldusimulering.

Framhaldandi útbúgving

MSc-avtala er um upptøku á DTU (Computer Science and Engineering, Communication Technologies and System Design, Human-Centered Artificial Intelligence), sum lýst á dtu.dk. KT-verkfrøði kann við møguligum avmarkingum eisini vera støði undir víðari útbúgvingum við onnur universitet. Dømir um undanfarnar upptøkur eru m.a. frá IT-universitetinum í Keypmannahavn (ITU). Arbeitt verður eisini við at menna eina masterútbúgving í dátuvísindum á Fróðskaparsetrinum, sum ætlandi skal byrja í 2023.