Skriva út

B.A. í listaligum arbeiði

BA in Creative Arts
  • Lestrartíð 3 ár
  • Deild Føroyamálsdeildin (FMD)
  • Tal á Lesandi uml. 15
  • ECTS 180
  • Lestrargjald (Fulltíðarlestur) Ókeypis fyri borgarar í danska ríkinum o.ø. Norðurlondum
  • Lestrargjald (Stakgreinir) 200 DKK/ECTS

Endamál

Studenturin ognar sær verkligan førleika til sjálvstøðugt listaligt arbeiði og fær grundleggjandi ástøðiliga vitan til at hugsa greinandi um list og egna skapanargongd.

Bygnaður

Útbúgvingin er 2/3 verklig og 1/3 ástøðilig og er býtt í tvær listaligar leiðir, ritlist og tónlist. Ein partur av námsevnunum er felags evni, og ein partur er treytaður av listaligu leiðini, sum studenturin velur.

1. lestrarhálva

2. lestrarhálva

3. lestrarhálva

4. lestrarhálva

5. lestrarhálva

6. lestrarhálva

Verkstova I

10 ECTS

Verkstova II

10 ECTS

Verkstova III

10 ECTS

Listaligt

arbeiði

20 ECTS

 

Skiftislestur/starvslæra

30 ECTS

Endalig verkætlan

20 ECTS

Egið arbeiði I

10 ECTS

Egið arbeiði II

10 ECTS

Egið arbeiði III

10 ECTS

     

Listaástøði I

10 ECTS

Listaástøði II

10 ECTS

Listaástøði III

10 ECTS

Listaástøði IV

10 ECTS

 

Ritgerð

10 ECTS

 

Skipan av útbúgvingini

Útbúgvingin tekur trý ár og er sett saman av skeiðum, har tey lesandi partvís fylgja einum føstum pensum og partvís arbeiða við egnum verkum. Áherðsla verður løgd á grundleggjandi vitan um list og listaligt arbeiði bæði ástøðiliga og verkliga. Frá byrjan verður arbeitt stigvíst við at menna førleikarnar at brúka ástøðiliga vitan í sjálvstøðugum listaligum arbeiði.

Tað eyðkennir útbúgvingina, at ástøði og verkligar royndir hanga saman. Í verkliga partinum verður lagt upp til verkætlanir, sum ganga tvørtur um hevdbundin mørk millum listagreinir. Tey, ið fáast við bæði ritlist og tónlist, hava møguleika at fylgja undirvísingini á báðum leiðum.

Fyrsta lestrarhálva er skipað í trý skeið, har av tvey umboða verkliga partin av útbúgvingini, og eitt umboðar ástøðiliga partin. Helvtin av verkligu undirvísingini fer fram í verkstovum, sum hava til endamáls at menna fakligu førleikarnar hjá teimum lesandi. Hin helvtin er egið arbeiði, har dentur verður lagdur á sjálvstøðuga skapanargongd. Eitt felagsskeið um almenna fagurfrøði myndar ástøðiliga triðingin av lestrarhálvuni.

Onnur og triðja lestrarhálva eru skipaðar eftir sama grundleggjandi leisti. Í verkstovunum verða nýggir arbeiðshættir royndir og viðgjørdir, meðan egna arbeiðið er beinleiðis framhald av arbeiðinum frá fyrstu lestrarhálvu. Í ástøðiliga partinum verða felagsskeið og serlig skeið fyri báðar leiðirnar.

Fjórða lestrarhálvan víkir frá fyrru lestrarhálvunum við tað, at listaliga arbeiðið í størri mun er grundað á listaligt samstarv millum studentarnar. Í staðin fyri verkstovur og egið arbeiði kemur eitt skeið í listaligum arbeiði, har studentarnir fáa eina felags uppgávu at loysa. Í ritlist fáa studentarnir til uppgávu at gera eitt tekstasavn við egnum tekstum. Í tónlist fáa studentarnir til uppgávu at gera eina tónleikaútgávu við egnum tónleikaverkum.

Fimtu lestrarhálvuna er møguligt at vera skiftislesandi á einum av útbúgvingarstovnunum uttanlands, sum útbúgvingin í listaligum arbeiði hevur avtalu við. Eisini er møguligt at fara í starvslæru í Føroyum ella uttanlands.

Sættu og seinastu lestrarhálvuna gera studentarnir endaliga verkætlan og ritgerð. Tveir triðingar av tíðini verða nýttir til endaligu verkætlanina, sum er eitt egið ritlista- ella tónlistaverk. Restin av tíðini er sett av til ritgerð, sum er knýtt at endaligu verkætlanini.

Innihald

Evnisøkið er skapandi listaligt arbeiði. Verkliga verður dentur lagdur á arbeiði í verkstovum bæði innan ta listagrein, sum studenturin hevur valt, og millum ymsar listagreinir. Ástøðiliga verður dentur lagdur á vitan um list í fagurfrøðiligum og bókmenta- ella tónleikafrøðiligum høpi.

Í verkstovunum á tónlistaleiðini verður undirvíst í tónalæru, harmoni, kompositión, útseting, tónleikatøkni og øðrum viðkomandi evnum. Á ritlistaleiðini verður undirvíst í frásagnarhættum, bundnum og óbundum skaldskapi og kreativari skriving, sum vendir sær til serstakar pallar og samanhangir.

Egna arbeiðið gevur teimum lesandi høvi at menna ein sjálvstøðugan listaligan samleika. Bólka- og einstaklingaundirvísing eru karmur um greining og kjak av verkum hjá teimum lesandi. Sum lesandi mennir tú eginleikan at fyrihalda teg kritiskt til egið listaligt virki og at geva øðrum grundaðan kritikk.

Ástøðiligi parturin fevnir um fyrilestrar og námsskeið í fagurfrøði, bókmentasøgu, bókmentafrøði, tónleikasøgu og tónleikafrøði. Sum lesandi fært tú innlit í siðsøguna, sum myndar tína yrkisgrein, og lærir um ástøði, sum geva tær førleika at greina list úr skiftandi sjónarhornum.

Endaliga verkætlanin og ritgerðin eru ætlaðar sum høvuðsinnihald í eini avriksmappu, sum skjalprógvar listaliga førleikan hjá tí lesandi mótvegis framtíðar arbeiðsgevarum og útbúgvingarstovnum. Úrslitið av verkætlanini er egið tónleika- ella bókmentaverk, meðan ritgerðin viðger verkið og skapanargongdina úr einum ástøðiligum sjónarhorni. Í báðum førum verður sjálvstøðuga arbeiðið vegleitt av viðkomandi undirvísara.

Próvtøkur

Skipað verður fyri próvtøkum tvær ferðir um árið. Vetrarpróvtøkur eru í desember og januar, summarpróvtøkur eru í mai og juni. Skipað verður fyri endurpróvtøku og sjúkrapróvtøku um várið og um heystið.

Upptøkutreytir

Treyt fyri upptøku er bókligt (t.e. gymnasialt) miðnámsskúlaprógv. Verður søkt eftir kvotu 2, kunnu aðrar fortreytir á javnsettum kunnleikastøði góðtakast eftir nærri meting.

Umframt hesar treytir er upptøka eisini treytað av, at egið arbeiði verður latið inn, sum staðfestir nøktandi listaligan førleika innan annaðhvørt ritlist ella tónlist. Verður søkt um upptøku til ritlist, skulu fimm síður av egnum skrivligum avriki latast inn. Verður søkt um upptøku til tónlist, skulu nótabløð av egnum tónleikaverki og/ella upptøkur uppá í mesta lagi fimm minuttir latast inn. Umsøkjarar skulu harumframt lata inn eina síðu, sum í stuttum lýsir teirra listaliga profil. Fyri hvørja leið metir ein upptøkunevnd við trimum limum um innkomna tilfarið.

Umsóknarfreist fyri kvotu 1 og kvotu 2 er 1. juni.

Framtíðarmøguleikar

Prógvið gevur grundarlag fyri sjálvstøðugum listaligum arbeiði sum annaðhvørt rithøvundur ella tónlistafólk, har ein í stóran mun myndar sína egnu yrkisleið.

Harumframt gevur útbúgvingin umsetiligar førleikar, ið eru hentir í miðlum, vinnuvirkjum og almennum stovnum, har nýskapan og hugflog eru eftirspurdir førleikar – tað verði seg sum teksthøvundur, vinnuligt tónaskald ella í øðrum starvi í kreativu vinnunum.

Framhaldandi útbúgving

Eftir lokna útbúgving ber til at søkja inn á annan lærdan háskúla ella tónlistaskúla at fáa MA-prógv. Neyðugt er at kanna upptøkutreytir í hvørjum føri, tí útbúgvingarstovnar hava ymiskar reglur.

Nærri kunning

Nærri kunning fæst við at skriva til list@setur.fo

Upptøka

BA í listaligum arbeiði tekur næstu ferð upp lesandi í 2021.

Tímatalva

tímatalva heystið 2021

Meira