1122.04 - Bókmentasøga I

1122.04

Bókmentasøga I

10

Studenturin skal ogna sær kunnleika um eldri norðurlendska og føroyska bókmentasøgu, læra seg at skilja og lýsa bókmentir sum søguligt fyribrigdi og læra seg at taka støðu til bókmentasøgu sum vísindi og lærugrein.

Lærugreinin fevnir um norðurlendska og føroyska bókmentasøgu frá miðøld til 1876. Lisnar verða norðurlendskar bókmentir, skaldsligar eins væl og yrkisbókmentir, frá miðøld til 1876. Lisin verða somuleiðis bókmentasøgulig verk, ritgerðir og greinir um bókmentir frá miðøld til seinnu helvt av 19. øld. Lisnar verða haraftrat greinir, sum viðgera støðuna hjá bókmentum í samfelagnum søguliga sæð. Í tí sambandi verður nomið við hugtakið bókmentastovnur, ið fevnir um slíkt sum forløg, ummæli, fjølmiðlar, virðislønir o.a. Lesturin kann vera skipaður í tíðarrað, tíðarskeið ella eftir søguligum "knútum"; hann kann miða seg eftir listfrøðiligum, hugmyndafrøðiligum, samfelagssøguligum ella politiskum og búskaparligum viðurskiftum. Lesturin kann eisini leggjast til rættis eftir temum ella tekstsløgum. Í lestrinum eiga tekstirnir at verða settir í samband við samfelagsviðurskiftini, við tann miðilin, sum ber bókmentirnar, tann stovnin, sum breiðir tær út, og teir lesarar, sum tær eru ætlaðar. Til próvtøkuna eigur studenturin at duga at: lýsa skaldsligu og yrkisbókmentaligu tekstirnar á lestrarlistanum við atliti at søgu tekstslagsins, staðseta og lýsa tekstirnar sum úrslit av menningarrákum í tíðarskeiðinum, sum teir eru vorðnir til í, gera grein á ymsum tulkingum av tekstunum og vísa á, hvussu bókmentasøguligar viðgerðir bera dám av vísinda- og mentanarrákum í tíðarskeiðinum, sum tær eru skrivaðar í. Til próvtøkuna gevur studenturin upp: A: Skaldsligar og yrkisligar bókmentir, og B: Bókmentasøguligar tekstir. A: SKALDSLIGAR OG YRKISLIGAR BÓKMENTIR: 4 skaldslig verk og 15 stuttar tekstir; av teimum seinnu eru 3 yrkistekstir, ella 3 skaldslig verk, 1 yrkisbókmentaligt verk og 15 stuttar tekstir. Skaldsligu verkini og stuttu tekstirnir skulu vera hóskandi spjadd við atliti at upprunatíð og tekstslag. Minst eitt skaldsligt verk skal vera føroyskt. Danskar, íslendskar, norskar (á nýnorskum og bókmáli) og svenskar bókmentir skulu vera umboðaðar við í minsta lagi tveimum skaldsligum verkum og 5 stuttum tekstum. B: BÓKMENTASØGULIG VERK: 3 bókmentasøgulig verk, partvíst samansett av greinum, sum bæði yvirlitskent og dýpandi viðgera norðurlendskar bókmentir í tíðarskeiðinum. Haruppií greinir, sum viðgera bókmentasøgu sum tekstslag.

2 tímar um vikuna í 2 lestrarhálvur.

Studenturin kann 1. fara til munnliga roynd við hálvtíma fyrireiking. Studenturin kann hava uppgivin verk og upprit síni hjá sær, meðan hann fyrireikar seg. Ella 2. skriva fría heimauppgávu. Uttanhýsispróvdøming.

Turið Sigurðardóttir