Um útbúgvingina

Við master í dátuvísindi kanst tú byggja víðari á tínar førleikar frá bachelor í KT-verkfrøði. Tað ber til at taka valskeið í dátugreining og vitlíki ella aðrar sergreinar, sum til dømis framhaldsskeið í forritan, tólneti ella KT-trygd.

Upptøkutreytir

Treyt fyri upptøku er bachelorprógv í: 1) KT-verkfrøði ella teldufrøði; 2) aðrari KT-útbúgving ella 3) aðrari útbúgving í t.d., verkfrøði, støddfrøði, hagfrøði, alisfrøði, evnafrøði ella lívfrøði. Grundleggjandi kunnleiki um stødd- og hagfrøði, og innleiðandi forritan er neyðugur. KT-royndir eru ein fyrimunur. Allar umsóknir verða viðgjørdar eftir nærri meting, tá tað ræður um fortreytir og tøk lestrarpláss. Góðir førleikar í enskum máli eru neyðugir.

Søk umvegis Vangan

Søk her

Innihald

Við innleiðandi skeiðum í vitlíki (AI/TV) og í stødd- og hagfrøði verða fortreytirnar hjá øllum lesandi dagførdar. Forritanarmálini í útbúgvingini vera Python, R og kanska onnur við. Valskeið kunnu takast í dátugreining og vitlíki, ella í øðrum sergreinum, sum til dømis framhaldsskeið í forritan, tólneti ella KT-trygd.

Skipan av útbúgvingini

Høvuðsdenturin er lagdur á serútbúgving í KT til dátugreining og vitlíki (AI), umframt at masterskeið eisini vera í tólneti (IoT) og dátutrygd. Útbúgvingin hevur kravd skeið (60 ECTS), valskeið/verkætlanir (30 ECTS) og eina masterverkætlan (30 ECTS). Valskeið/verkætlanir kunnu takast á Fróðskaparsetrinum, í samstarvi við KT-vinnuna og/ella í samstarvi við onnur universitet. Til dømis á Danmarks Tekniske Universitet (DTU) við undangóðkenning frá Fróðskaparsetri Føroya. Fróðskaparsetrið hevur eisini samstarvsavtalu við Edinburgh Napier University í Skotlandi, haðani valskeið í KT-trygd kunnu takast sum fjarlestur.

Upptøkan í ár er til lestur fulla tíð uppá 2 ár. Útbúgvingin var í 2023 skipað sum parttíðarlestur og kundi tá takast uppá 4 ár (2023-2027). Lesandi, sum ikki vilja lesa fulla tíð, kunnu ístaðin søkja stakgreinalestur frá báðum lestrarbygnaðunum. Undantikin eru skeið frá Edinburgh Napier University, sum ikki kunna takast av stakgreinalesandi.

Framtíðarmøguleikar 

Masterútbúgvin í Dátuvísindum hava stórar og fjølbroyttar møguleikar í KT-vinnuni, á privata og almenna arbeiðsmarknaðinum sum heild og somuleiðis á granskingarøkinum:

• Vitlíki til mál- og myndaviðgerð innan fyri tænastu og framleiðslu, t.d. til góðskutrygging og automatisering
• Dátugreining av stórum dátunøgdum, t.d. av sosialum netverkum, fíggjarligum ella lívfrøðiligum data
• Maskinlæring og máltøkni til føroyskt mál, tekstumseting og til telduspøl/kringvarp/film
• fjarskiftistøkni og tólnet til dátuinnsavnan og -viðgerð til heilsutænastur, orkuframleiðslu ella alivinnu
• Menning og rakstur av tryggum KT-skipanum
• Maskinlæring til grøna orku- og umhvørvistøkni
• Íverksetan, menning og verkætlanarleiðsla
• Undirvísing, gransking og teldusimulering, t.d. av veðurlagi og umhvørvisbroytingum

Framhaldandi útbúgving

M.Sc. í Dátuvísindum á Fróðskaparsetri Føroya kann (treytað av fígging) geva atgongd til granskaraútbúgving (ph.d.) í KT í Føroyum ella uttanlands.

Lestrarlív

Tá tú byrjar at lesa á Fróðskaparsetri Føroya, verður tú partur av einum livandi og tætt knýttum lestrarumhvørvi mitt í hjartanum av Havnini. Her ert tú – saman við hinum lesandi – í miðdeplinum, bæði tá ið tað kemur til læring og sosialt lív.

Frá fyrsta degi verður tú væl móttikin til eina skipaða intro-viku og verður partur av einum lestrarbólki saman við øðrum nýggjum lesandi.

Gott lestrarumhvørvi

Á Setrinum verður nógv gjørt fyri at skapa eitt gott lestrarumhvørvi. Her eru lestrarhøli, køkar og lestrarstovur, har tú kanst arbeiða saman við øðrum, drekka ein kaffimunn og taka tær av løttum. 

Tú fært skjótt eina kenslu av, hvussu tað er at lesa á einum universiteti, og hvussu tað er at vera partur av einum spennandi og mennandi felagsskapi.

Felagsskapur og netverk

Tú kanst eisini luttaka í ymiskum felagsskapum og tiltøkum, sum verða skipað av og fyri lesandi. Her møtir tú fólki úr øðrum útbúgvingum og árgangum – eitt frálíkt høvi at knýta vinabond og skapa eitt sosialt netverk. Eisini hevur tú møguleika at luttaka í ráðum og nevndum, har tú kanst gera mun og fáa royndir, sum kunnu brúkast seinni í lívinum.

At lesa í Føroyum merkir eisini, at náttúran og mentanin eru altíð tætt við. Tað er stutt millum lestrarhøli og fjøll, hav og mentanarlív – og hetta ger Tórshavn til eitt serliga gott stað at vera lesandi.

Viðmældar fortreytir

Fyri umsøkjarar við manglandi fortreytum er viðmælt at fyrireika seg við stakskeiðum, t.d. taka minst: 10 ects í støddfrøði, 5 ects í hagfrøði (helst við R), og 5 ects í innleiðandi forritan (helst við Python). Sum stakskeið úr KT-verkfrøði er viðmælt at taka skeiðini: Diskret støddfrøði, Lin. Algebra fyri KT-verkfrøðingar, Dátuvísindi og hagfrøði við RStudio, Innleiðandi forritan við Python.

Annars, ynskiligt at taka tvey ella fleiri av hesum skeiðum eisini: Teldunetverk og datasamskifti, Databasur og SQL, Objektrættað forritan við Java 1, Innleiðing til Web-skipanir, Algoritmur og datustrukturar, Stýriskipanir ella Linux-skipanir, KT-trygd. Tilsvarandi stakskeið kunna eisini takast úr øðrum útbúgvingum.

Endamál

Endamálið er at lyfta KT-førleikarnar hjá tykkum lesandi til masterstig í dátuvísindum og at geva grundarlag fyri framtíðar KT-gransking í dátuvísindum á ph.d-stigi. M.Sc. í Dátuvísindum byggir á førleikarnar í stødd- og hagfrøði, teldufrøði og forritan frá B.Sc. í KT-verkfrøði og útbýr serfrøðingar til KT-vinnuna og gransking.

Bygnaður

Árgangur 2025

Lærugreinir tiknar á øðrum universitetum kunnu eftir nærri meting í summum førum góðskrivast ístaðin fyri kravd skeið í útbúgvingini. Valskeið kunnu takast í Føroyum ella uttanlands. Gevið gætur: Fyrivarni verður tikið fyri broytingum.

Nærri kunning

Nærri kunning fæst við at venda tær til Kirstin Sigurðsdóttir Rasmussen, lestrarvegleiðara á Náttúruvísindadeildini (kirstinr@setur.fo) ella við at venda sær til ein av útbúgvingarleiðarunum, Esther Chen: EstherC@setur.fo .