Mannarættindi á tímatalvuni

Amerikanski professarin í lóg, Frederick Schauer, undirvísti mikudagin 9. juni løgfrøðilesandi á Søgu- og samfelagsdeildini um mannarættindi sum partur av føroyskum stjórnarskipanarætti I

Schauer greiddi m.a. frá um munin á rættindunum, sum hesi eru skrivað, og sum hesi eru í veruleikanum. Hann greiddi frá, hvussu mentan hevur stóran týdning fyri, hvussu rættindi í veruleikanum verða tulkað. Eitt nú kunnu søgulig og politisk viðurskifti verða týðandi. T.d. er tolsemið av søguligum grundum minni mótvegis haturstalu í Týsklandi enn í USA.

Umframt mentan og politiska søgu hevur eisini neyvleikin í mannarættindaskjølum, og hvussu trupul ella løtt viðkomandi stjórnarskipan er at broyta, týdning fyri, hvussu mannarættindi verða tulkað, og hvat stig av frælsi, ið dómstólarnir loyva sær í tulking.

Lesið annars eisini um evnisdagin, sum verður á Søgu- og samfelagsdeildini fríggjadagin í sambandi við vitjanina hjá Schauer á Fróðskaparsetrinum, her.