M.Sc. í Dátuvísindum

• Lestrartíð Parttíðarlestur: 4 ár
• Deild Náttúruvísindadeildin (NVD)
• Tal á Lesandi Uml. 20
• ECTS 120
• Lestrargjald (Fulltíðarlestur) Ókeypis fyri borgarar í danska ríkinum o.ø. Norðurlondum
• Lestrargjald (Stakgreinir) 200 DKK/ECTS

Endamál

At nøkta tørvin á høgt útbúnum starvsfólki í KT-vinnuni og at geva grundarlag fyri framtíðar KT-gransking á ph.d-stigi. M.Sc. í Dátuvísindum byggir víðari á førleikarnar givnir í B.Sc. í KT-verkfrøði og útbýr serfrøðingar til KT-vinnuna og gransking. Av serligum áhuga fyri M.Sc. í Dátuvísindum er kollveltingin á m.a. hesum økinum:

• Tilgjørt Vit (AI): maskinlæring og djúp læring.

Útbúgvingin leggur áherðslu á tilgjørt vit (AI/TV), tólnet (IoT) og KT-trygd, umframt at møguleiki er fyri valfríum skeiðum/verkætlanum svarandi til 30 ECTS.

Bygnaður (parttíðarlestur 4 ár)

Lærugreinir tiknar á øðrum universitetum kunnu eftir nærri meting í summum førum góðskrivast ístaðin fyri kravd skeið í útbúgvingini. Valskeið kunnu takast í Føroyum ella uttanlands. Gevið gætur: Fyrivarni verður tikið fyri broytingum.

Skipan av útbúgvingini

Høvuðsdenturin í útbúgvingini er lagdur á serútbúgving í KT til dátugreining, tilgjørt vit og tólnet, umframt at møguleiki eisini verður at serútbúgva seg á øðrum økjum, so sum forritan og menning av tryggum KT-skipanum (KT-trygd).

Innihald

Við innleiðandi skeiðum í tilgjørdum viti (AI/TV) og í stødd- og hagfrøði verða fortreytirnar hjá øllum lesandi dagførdar. Lesandi, sum ikki hava tikið B.Sc. í KT-verkfrøði, kunna eisini fáa bjóðað ávís skeið úr B.Sc. í KT-verkfrøði-útbúgvingini. 30 ECTS av útbúgvingini eru valskeið, sum eisini kunna takast uttanlands á t.d. Danmarks Tekniske Universitet.

Dentur verður lagdur á nýggjastu KT-evni (AI, IoT, Security) og menning av tryggum og vælvirkandi  KT-skipanum, sum geva góðar vinnumøguleikar í framtíðar KT-vinnu og samfelagsfyrisiting. Vanligastu forritanarmálini vera Python og R til dátuvísindi, umframt onnur mál til forritan og rakstur av KT-skipanum.

Útbúgvingin er í 2023 skipað sum parttíðarlestur og kann takast uppá 4 ár. Frá 2024 verður útbúgvingin ætlandi bjóðað bæði fulla tíð og sum parttíðarlestur.

Upptøkutreytir

Treyt fyri upptøku er bachelorprógv í: 1) KT-verkfrøði ella teldufrøði, 2) aðrari KT-útbúgving ella 3) aðrari útbúgving í t.d., verkfrøði, støddfrøði, hagfrøði, alisfrøði, evnafrøði ella lívfrøði. Allar umsóknir verða viðgjørdar eftir nærri meting, tá tað ræður um fortreytir og tøk lestrarpláss. Góðir førleikar í enskum máli eru neyðugir.

Framtíðarmøguleikar

Sum M.Sc. í Dátuvísindum hevur tú fjølbroyttar møguleikar at arbeiða við:

• tilgjørdum viti til mál- og myndaviðgerð í tænastu og framleiðslu, t.d. til góðskutryggjan og automatisering
• dátugreining og av stórum dátunøgdum, t.d. av sosialum netverkum, fíggjarligum ella lívfrøðiligum dátum
• maskinlæring og máltøkni til føroyskt mál, til tekstumseting og til telduspøl/kringvarp/film
• 5G-fjarskitistøkni og tólnet til dátuinnsavnan og -viðgerð í heilsutænastum, orkuframleiðslu ella alivinnu
• menning og rakstur av tryggum KT-skipanum
• maskinlæring til grøna orku- og umhvørvistøkni
• íverkseting, menning og verkætlanarleiðslu
• undirvísing, gransking og teldusimulering, t.d. av veðurlagi og umhvørvisbroytingum

Framhaldandi útbúgving

M.Sc. í Dátuvísindum á Fróðskaparsetri Føroya kann (treytað av fígging) geva atgongd til granskaraútbúgving (ph.d.) í KT í Føroyum ella uttanlands.